Wat is Oostfräisk Plat?

Dat Oostfräisk Plat (kört: Oostfräisk) is ‘n tóól, däi in Oostfräisland proot’t word’t. Oostfräisk is fan d’ tóólklassifikóósjoon nóó ‘t stamboommodel fan August Schleicher ‘n wariâant fan dat Leeğdüütsk.

Man däi oorsprungelk tóól fan Oostfräisland was bit in ‘t lóóet middeloller dat Fräisk. Leeğdüütsk kwam as fröem tóól un kun sük eerst lóóterweğ as folkstóól etóbläären.

Däi wellenteorii fan Hugo Schuchardt differensäärt dat beskriiven fan d’ tóólwannel. Däi êerst wäel was dat Leeğdüütsk, dat däi fräisk oortóól in Oostfräisland in ‘t 18. jorhunnert bold häilmóóls ooverlóógert haar. Dat Fräisk dee siin spooren f’râal in d’ substróótwoorden un in d’ foonoloogii achterlóóten.

As twäied wäel kwam dat Hollandsk, dat ‘n stâark inflaud up däi woordskat fan ‘t Oostfräisk haar. Däi dâard wäel fertöönt sük in d’ romóónsk woordskat, däi oover ’t Hollandsk, Düütsk of direkt uut dat Fransk in ‘t Oostfräisk koomen is. Däi fäärd un läest wäel is dat Düütsk, wat fandóóeğ döör däi tweitóóliğkaid fan Oostfräisland f’rallen däi woordskat fan ‘t Oostfräisk döör läinwoorden un interferensen beinflauden daajt.

Dat Oostfräisk Plat is ‘n buent kuntakttóól un funksjoonäärt in däi praksis as ‘n fulweerdiğ tóól. Dat Oostfräisk het fäär grôot dióólekten, däi sük f’rallen döör ‘n luudferskuuven unnerskäident un t’sóómen dat Oostfräisk Plat bildent.